Baraza la Madiwani wilayani Iramba limemfuta kazi Mkuu wa Idara ya fedha, Muhidini Mohamed ambaye alikuwa Mweka hazina. Picha na Hemedi Munga

Posted on: September 19th, 2019

Hemedi Munga. Irambadc

tehama@irambadc.go.tz

Iramba. Baraza la Madiwani wilayani Iramba limemfuta kazi Mkuu wa Idara ya  fedha, Muhidini Mohamed ambaye alikuwa Mweka hazina.

Hayo yameelezwa na Mwenyekiti wa Halmashauri ya wilaya ya  Iramba, Simion Tiyosera katika ukumbi wa mkutano leo Septema 19, 2019.

Akitoa maamuzi hayo ya Baraza la Madiwani  baada ya kujigeuza kuwa kamati ya  mamlaka ya kinidhamu na kuchakata kwa kina mwenyekiti wa Halmashauri ya Wilaya ya Iramba, Simion Tiyosera amesema  kwa mamlaka ya baraza kutokana na makosa mbalimbali na makosa ya kitaalam kwa upande wa idara ya fedha baraza limemvua Mohamed madaraka yake na kumfuta kazi.

“  Lakini pia kwa masikitiko makubwa kwa makosa  aliyoyatenda ya ubadhirifu na makosa mengine ya kitaalam kwa upande wa  idara ya fedha Mkuu wa Idara bwana  Muhidini Mohamed kwa masikitiko makubwa Baraza limemvua madaraka yake ya ukuu wa Idara na kumfukuza  kazi” Alisema Tiyosera

Wakati huo huo Baraza limempunguzia adhabu bwana Julius Dyobili kwa kumpunguzia mshahara.

“Ninatangaza kwa mamlaka ya Baraza kutokana na makosa mbalimbali  waliyoyafanya bwana Julius Dyobili akiwa upande wa idara ya fedha kwa makosa yake aliyoyafanya Baraza limetoa adhabu ya kumpunguzia mshahara” Aliongeza Tiyosera

Hata hivyo Baraza limekamilisha uteuzi wa wakuu wawili wa Idara waliokuwa wakikaimu Idara hizo nakuwa wakuu wa Idara kamili ambapo Bibi Jeni Ngondi kuwa Mkuu wa Idara ya Maendeleo na Ustawi Wajimii na Daktari Hussen Sepoko akiteuliwa kuwa Mganga Mkuu wa Hospitali ya Wilaya ya Iramba Kiomboi.

Huku Baraza likikasimu madaraka ya ukuu wa Idara ambapo bwana Hadhil Ngayunga kuwa Mkuu wa Idara ya fedha yani Mweka Hazina na Bibi Tatu Ntandu kuwa Mkuu wa Kitengo cha Ugavi wilayani Iramba Mkoa wa Singida.                                                                                                                                                                                                                                                                                                                                                                                                                                                                                                                                       

Baraza pia limewathibitisha watumishi 59 kazini nakuagiza kuyafanyia kazi maamuzi yote yaliotolewa na baraza kwa mustakabali mzuri wa Halmashauri ya Wilaya ya Iramba.

Akiongea katika baraza hilo Katibu wa Chama cha Mapinduzi Wilayani Iramba, Jamila Mujungu amempongeza Mwenyekiti wa Halmashauri na Baraza lake kwa  ujasiri wa kutetea maslahi ya wananchi kwa upana wake.

Aidha amewapongeza madiwani na  wataalam wote  kwa hatua nzuri ya ukusanyaji wa mapato ya Halmashauri, huku akiamini kuwa watafika pazuri.

Kwa upande wake Mkurugenzi Mtendaji wa Halmashauri ya Wilaya ya Iramba, Linno Mwageni amewatoa hofu madiwani kuwa mahali ambapo panatarajiwa kujengwa stendi ya mabasi patakua na uwekezaji wa kisasa.

Huku akibainisha kuwa taratibu za kimanunuzi zitakamilika kwa haraka  na mwezi wakumi mabasi yataanza kupita katika stendi hiyo ili kutengeneza chanzo cha mapato endelevu cha Halmashauri.