Baraza la Madiwani Wilayani Iramba limewafukuza kazi watumishi wawili wa kada tofauti

Posted on: March 13th, 2020

Hemedi Munga, Irambadc

tehama@irambadc.go.tz

Iramba. Baraza la Madiwani la Halmashauri ya Wilaya ya Iramba limewafukuza kazi Watumishi wawili wa kada tofauti waliokuwa wakihudumu Wilayani hapa.

Maamuzi hayo yametangazwa leo Ijumaa Machi 13, 2020 na Mwenyekiti wa Halmashauri hiyo Simion Tyosela baada ya Baraza hilo kujigeuza kuwa kamati ya nidhamu katika ukumbi Mdogo wa Halmashauri hiyo mjini hapa.

“ Tulivyo jigeuza kuwa kamati ya  mamlaka ya kinidhamu Baraza letu tukufu limekubaliana kumfukuza kazi Mtendaji wa kijiji daraja la tatu  Yesaya Magala kwa tuhuma za rushwa,” amesema Tyosela

Magala anatuhimiwa kwa kosa la  rushwa na mahakama imemtia hatiani kwa kosa hilo kutokana na ushahidi wa kimazingira

Pia Baraza hilo limemfukuza kazi dereva daraja la pili, Juma Mgeni kwa kuto kuwa kazini kwa siku takriban 1460.

“ Baraza letu tukufu limeidhinisha kumfukuza  kazi Juma Mgeni kwa kuwa mfumo tayari umeisha muondoa,” amesema Tyosela

Halikadhalika Tyosela amewataka Madiwani wa Baraza hilo kuwaelimisha Wananchi waliopo katika maeneo yao kulima mazao ya muda mfupi ili mvua zitakapokata waweze kupata mazao na kuweza kuepukana na janga la njaa.

Akijibu swali la Diwani wa Kata ya Shelui, Kinota Hamisi aliyetaka kujua Mchango wa Wananchi katika ujenzi wa kituo cha Afya Shelui, Mkurugenzi Mtendaji wa Halmashauri hiyo, Linno Mwageni amesema wananchi wanapaswa kushiriki na tayari wameanza kuwaelimisha namna ya ushiriki wao.

Mwageni amewaomba Madiwani hao kutoa elimu kwa wananchi wao kuchukua  tahadhari yakuweka miundombinu vizuri dhidi ya mvua zinazoendelea kunyesha huku akiahidi kuyafanyia marekebisho maeneo yatakayokuwa yameathirika.

Naye Makamu Mwenyekiti wa Halmashauri hiyo, Samwel Shillah amewashukuru  Madiwani hao kwa ushirikiano wanaoutoa katika kamati ya Fedha, mipango na Utawala huku akiwataka kuchukua vibanda vitakavyojengwa katika viwanja vya stendi mpya ya mabasi kijiji cha Misigiri Kata ya Ulemo.

Baraza la Madiwani lilianza kwa maswali ya papo kwa papo kwa Mkurugenzi Mtendaji wa Halmashauri hiyo, Linno Mwageni kuyatolea majibu.

Baraza la Madiwani hukaa kikao  chake cha kisheria kila baada ya miezi mitatu.

MWISHO

Mkurugenzi Mtendaji wa Halmashauri ya Wilaya ya Iramba, Linno Mwageni akijibu maswali mbalimbali yalioulizwa na Madiwani. Wakatikati ni Mwenyekiti wa Halmashauri hiyo Simion Tyosela na kushoto mwa Mwenyekiti huyo ni Makamu Mwenyekiti wa Halmashauri hiyo, Samwel Shillah. Picha na Hemedi Munga

Madiwani wakisikiliza dua ya kuliombea Baraza ikisomwa  na Mwenyekiti wa Baraza hilo, Simion Tyosela. Picha Hemedi Munga

Baadhi ya Madiwani wakifuatilia uwasilishaji wa taarifa za kamati mbalimbali za Baraza hilo. Picha na Hemedi Munga

Baadhi ya Madiwani wakifuatilia uwasilishaji wa taarifa za kamati mbalimbali za Baraza hilo. Picha na Hemedi Munga

Baadhi ya Madiwani wakifuatilia uwasilishaji wa taarifa za kamati mbalimbali za Baraza hilo. Picha na Hemedi Munga

Wenyeviti wa Kamati za Baraza hilo wakijiandaa kuwasilisha taarifa za kamati zao wakati wa kikao cha Baraza hilo. Picha na Hemedi Munga