Mkuu wa Mkoa wa Singida, Dkt Rehema Nchimbi kushoto akimkabidhi Mwenge wa Uhuru Mkuu wa Mkoa wa Tabora, Aggrey Mwandri kulia. Picha na Hemedi Munga

Posted on: August 26th, 2019

Hemedi Munga, IrambaDC

tehema@singidadc.go.tz

Iramba – Singida. Mkuu wa Mkoa wa Singida, Dkt. Rehema Nchimbi ameukabidhi Mwenge wa Uhuru 2019, kwa Mkuu wa Mkoa wa Tabora, Aggrey Mwandri   leo Agosti 26, 2019 Mgongoro mpakani mwa  Singida na Tabora.

Akikabidhi Mwenge huo, Dkt. Nchimbi amemueleza Mkuu wa Mkoa wa Tabora  kuwa mwenge wa Uhuru,  unawaka,  unameremeta,  na kwa heshima zote za kumuwakilisha Rais Jonh Pombe Magufuli pamoja na itifaki yote ya mbio za Mwenge wa Uhuru kitaifa 2019  ipo  salama.

Akitoa taarifa fupi ya mbio za Mwenge wa Uhuru, Dkt. Nchimbi amesema kuwa Mwenge wa Uhuru umekimbizwa kwa siku saba sawa na kilometa   804.8  katika Halmashauri saba  za mkoa wa Singida huku ukiwa umepitia jumla ya miradi 46.

Miradi ambayo inahusu sekta ya elimu, afya, mazingira, maji, utawala bora, kilimo, ushirika, biashara, elimu ya mpiga kura, program za mapambano dhidi ya dawa za kulevya, malaria, rushwa na UkIMWI. Aliongeza Nchimbi

Akieleza suluhisho la  vijana walio maliza JKT wa oparesheni Magufuli, oparesheni  Kikwete na oparesheni nyinginezo Mkoani Singida  amewataka vijana kuchukua mizinga ili wafuge nyuki wajipatie kipato kizuri  na waachane na ukataji wa miti  unaoharibu mazingira.

Ameyasema hayo mbele ya mkimbiza mwenge kitafa, Ndugu Mzee Ali ukiwa ni mkakati wa pili unaoitwa achia shoka kamata  mzinga ulioanzishwa mkoani Singida kwa lengo la kuachana na ukataji wa miti kwa ajili ya kuchoma mkaa kutafuta kipato.

“Tumesema waachie shoka wakamate mzinga, ukiwa na mizinga ukifuga nyuki, unatunza mazingira ambayo ni vyanzo vya maji.” Alisema nchimbi

Mkakati wapili unakuja baada ya kufanikwa kwa mkakati wakwanza uliotabulika kama mshahara wangu uko wapi wenye lengo la kuhakikisha kuwa watumishi wa umma wanaona mishahara yao na kumpenda muajiri wao.

Mkakati huo ulizinduliwa na mbio za mwenge wa Uhuru Kitaifa mwaka  2018 na watumishi wameweza kuonesha mishahara yao kupitia kilimo,ufugaji, ufundi, uvuvi, ujasiriamali na mambo mengine na kuweza kuwa na miradi inayowawezesha kuwaajiri wengine.

Kwa upande wake Mkuu wa Mkoa wa Tabora, Aggrey Mwandri amekiri kuupokea Mwenge wa Uhuru 2019 na kuahidi kuulinda Mwenge wa Uhuru pamoja na wakimbiza mwenge kitafa kwa siku zote watakazokuwa Mkoani Tabora.