WATANZANIA WATAKIWA KUTEMBELEA BANDA LA WIZARA YA MALIASILI NA UTALII KUJIFUNZA SHUGHULI ZA UHIFADHI

Posted on: August 5th, 2025

WATANZANIA WATAKIWA KUTEMBELEA BANDA LA WIZARA YA MALIASILI NA UTALII KUJIFUNZA SHUGHULI ZA UHIFADHI

Mkuu wa Wilaya ya Iramba, Mkoani Singida Suleiman Yusuph Mwenda amewasihi Watanzania kutembelea banda la Wizara ya Maliasili na Utalii ili kujifunza shughuli mbalimbali za Uhifadhi na Historia ya maisha ya mwanadamu.

Mwenda amesema hayo Agosti 5, 2025 Nzuguni Jijini Dodoma alipotembelea banda la Wizara ya Maliasili na Utalii, katika maonesho ya 32 ya wakulima, wafugaji na wavuvi (Nanenane) huku akiipongeza Wizara hiyo kwa kuweka mazingira mazuri na wezeshi kwa watazamaji kufanya Utalii wa ndani kupitia rasilimali za taifa zilizopo hapa nchini.

"Kwakweli ni eneo muhimu kutembelea hasa kwa viongozi hata kwa wananchi, kwa watoto na wakubwa kuna sehemu ya makumbusho ya vitu vya asili inayoonesha mabadiliko ya maisha, kutoka zama zilizopita mpaka sasa, lakini pia watapata fursa ya kujifunza historia ya nchi yetu, haya yote yanapatikana katika banda la Wizara ya Maliasili na Utalii." alisema DC Mwenda.